25.4.13

നോവ്‌

വിതുമ്പി നിന്ന
മേഘത്തെ
പടിഞ്ഞാറന്‍ കാറ്റ്
വിരുന്നിനു കൂട്ടി...

തുള്ളി കാത്തിരുന്ന
കള്ളിമുള്‍ച്ചെടിക്കിന്നും
വെള്ളാരംകല്ലുതന്നെ കൂട്ട്‌

22.4.13

വേനല്‍

ധരണിയിലേക്ക്
ആഴ്ന്നിറങ്ങുന്നു
കറുത്ത വേനലിന്റെ
കൂര്‍ത്ത ദംഷ്ട്രകള്‍ ...!
ജീവജലത്തിനായ്
കേഴുകയാണമ്മ..!
വിണ്ണേ കനിയുക
മണ്ണേ നനയ്ക്കുക....!

20.4.13

പലായനം

                                           മരണം കാത്തുകിടക്കുകയാണ്
                                           സ്‌നേഹമെന്നവര്‍ പറഞ്ഞു
                                           മരണമൊഴിയെടുക്കാന്‍
                                           കാമുകന്റെ കുപ്പായമിട്ട് അനും
                                           കാമുകിയുടെ ഉടയാടയിട്ട് അളും
                                           അരികത്തിരുന്നുറക്കമൊഴിച്ചു
                                           തെല്ലൊന്നു മയങ്ങിയപ്പോള്‍
                                           സ്‌നേഹം ഇരുവരേയും പറ്റിച്ച്
                                           കാശിയ്ക്കു പോയി...!

18.4.13

ഇ - ലോകം Epi: 25 (18.04.2013)

                                 
                                   ബ്ലോഗര്‍: ത്വല്‍ഹത്ത് ഇഞ്ചൂര്‍

പിറവി

                                                             രാവിന്റെ കുളിരില്‍
                                                             ഇലയെ കെട്ടിപ്പിടിച്ച
                                                             മഞ്ഞുതുള്ളിക്ക്‌
                                                             പ്രഭാതമായിട്ടും
                                                             വിടപറയാന്‍ മടി...
                                                             അരുണന്റെ തലോടലും
                                                             തഴുകലും കണ്ടപ്പോള്‍
                                                             മഞ്ഞിനു പിണക്കം..
                                                             ഇലയ്ക്കാണെങ്കില്‍ ശങ്ക,
                                                             ഹിമത്തെ പുല്‍കണോ,
                                                             അരുണനെ പുണരണോ..!
                                                             അരുണന്റെ രൂക്ഷനോട്ടം...
                                                             ഇലയ്ക്കു നിസംഗഭാവം..
                                                             മഞ്ഞ് ഇലയില്‍ അമര്‍ന്നു..
                                                             ഇലയിലൂടെ തുള്ളികള്‍
                                                             ഭൂമിയുടെ ഗര്‍ഭത്തിലേക്ക്
                                                             ഒരു ഹരിതകത്തിന്റെ
                                                             പിറവിയ്ക്കു സൂര്യസാക്ഷ്യം!

11.4.13

ഇ - ലോകം Epi: 24 (11.04.2013)

                                ബ്ലോഗര്‍: അന്‍വര്‍ ഹുസൈന്‍

8.4.13

ഇതോ മാധ്യമ ധര്‍മം?


പ്രതികളാക്കി ചിത്രീകരിച്ചപ്പോള്‍ ബ്ലാക്ക് ആന്‍ഡ് വൈറ്റാക്കി കൊടുത്ത ഫോട്ടോ പിറ്റേന്ന് മള്‍ട്ടികളറില്‍ അച്ചടിച്ച് ഖേദപ്രകടനം നടത്തിയാല്‍ ചെയ്ത പാപം തീരുമോ മുത്തശ്ശി പത്രമേ...! സ്വന്തം ലേഖികക്കു എന്തു കുന്തവുമാകാമെന്നാണോ...!? കലാകാരന്മായ വിദ്യാര്‍ത്ഥികളെ 'കൊലാ'കാരന്മാക്കി മാറ്റിയ തൊലിക്കട്ടി അപാരം തന്നെ!
ഒരു തെറ്റൊക്കെ ഏതു പോലീസുകാരനും പറ്റുമെന്നു പറഞ്ഞ് ഒഴിഞ്ഞുമാറാവുന്ന ഒരു സംഗതിയാണിതെന്ന് എനിക്കു തോന്നുന്നില്ല. നിങ്ങള്‍ക്കോ....?

വേദന



ഒരു ചെറു നീരരുവി
കരയിലൊരാല്‍ മരവും
തണലിലൊരാള്‍ വെറുതേ
ഒരു കുളിര്‍ കാറ്റലയില്‍
കരുതലിനാല്‍ത്തറയില്‍
പഥികനുറങ്ങിടുമ്പോള്‍
ഉണരുകയായമൃതായ്
പ്രകൃതി തന്നുള്‍ത്തടങ്ങള്‍...!
ഒടുവിലുണങ്ങിയൊരാല്‍
ചിലരുടെ വിരുതുകളാല്‍
തണലിനിയാരുതരും
ഉരുകുമൊരീ പകലില്‍
കനിവിനിയാരു തരും
വരളുമീ ഭൂമികയില്‍
ഒരു തണല്‍ തേടിയൊരാ
പഥികനൊരാള്‍ വരുമ്പോള്‍..!

5.4.13

മോണോ ആക്ട്‌


ആറാംക്ലാസില്‍ പഠിക്കുമ്പോഴാണ്. ചെറുതായി മോണോ ആക്ടൊക്കെ  ചെയ്യുമായിരുന്നു. അതുകൊണ്ടുതന്നെ സ്‌കൂള്‍ കലോത്സവത്തില്‍ ഒരു കൈനോക്കാമെന്നു കരുതി പരിപാടിക്കു പേരും കൊടുത്തു. ശ്രീകുമാരന്‍ മാസ്റ്റര്‍, രതി ടീച്ചര്‍ എന്നിവരുടെ പ്രോത്സാഹനമായപ്പോള്‍ ഒരു ധൈര്യമൊക്കെ വന്നു. എന്തൊക്കെയോ തട്ടിക്കൂട്ടി ഞാനും ചിലതൊക്കെ പഠിച്ചു തയ്യാറായി.

കലോത്സവദിനം.
വിവിധ പരിപാടികള്‍ അരങ്ങുതകര്‍ത്തുകൊണ്ടിരുന്നു...

'അടുത്തതായി മോണോ ആക്ട്. ജഡ്ജസ് പ്ലീസ് നോട്ട്... ചെസ്റ്റ് നമ്പര്‍ 37,  45, 69...... '
മോഹനന്‍ മാഷിന്റെ അനൗണ്‍സ് കേട്ടപ്പോള്‍ നെഞ്ചിടിപ്പു വര്‍ധിച്ചു.
ചെസ്റ്റ് നമ്പര്‍ 45 ആയ എലുമ്പന്‍ ചെറുക്കനെയും അതായത് എന്നേയും
മത്സരാര്‍ത്ഥികളിരിക്കുന്ന ബെഞ്ചിലേക്ക് ഹമീദ് മാസ്റ്റര്‍ ആനയിച്ചു.

'ആദ്യമായി ചെസ്റ്റ് നമ്പര്‍ 37 '
ഇതു കേട്ടപ്പോള്‍ ഒരു പെണ്‍കുട്ടി എഴുന്നേറ്റു.
വിറക്കുന്ന പാദങ്ങളുമായി അവള്‍ വേദിയിലേക്കു കയറി. അധികം ഉയരമൊന്നുമില്ലാത്ത
കറുത്ത് തടിച്ചൊരു കുട്ടി. മഞ്ഞപ്പട്ടു പാവാടയണിഞ്ഞ് ഇരുവശത്തേക്കും മുടി പിന്നിയിട്ട്
അവള്‍ മൈക്കിനു മുമ്പിലെത്തി. അപ്പോഴും അവളുടെ വിറ മാറിയിട്ടില്ലെന്ന് ഒറ്റനോട്ടത്തില്‍
തന്നെ മനസ്സിലാകും.   പേടിച്ച് വിറച്ചുകൊണ്ട് സദസ്സിലേക്കും താഴേക്കും പിന്നെ വശങ്ങളിലേക്കുമൊക്കെ അവള്‍ നോക്കിക്കൊണ്ടിരുന്നു....
അവള്‍ക്കൊന്നും പറയാന്‍ കിട്ടുന്നില്ല.
കാണികളുടെ മുഖത്ത് അയ്യോ പാവം എന്ന ഭാവം!
അധ്യാപകരുടെയൊക്കെ കണ്ണുകളില്‍ സഹതാപമുണ്ടോ....!
ഏതോ ഒരുത്തന്‍ എവിടെ നിന്നോ കൂവിയെന്നും തോന്നുന്നു...!
ഇതൊക്കെ കണ്ടുനിന്ന അന്നത്തെ എനിക്ക് ഇത്തിരി ആവേശവും അല്‍പം സന്തോഷവുമൊക്കെയാണുണ്ടായതെന്ന് പറഞ്ഞാല്‍ പോരേ!
രക്ഷപ്പെട്ടു. എല്ലാവരും ഇങ്ങനെയൊക്കെ തട്ടിമുട്ടിയാല്‍ ഒരു സമ്മാനം
ഞമ്മക്കൊപ്പിക്കാമല്ലോ...! :)

മൈക്കിലൂടെ അവളുടെ ശബ്ദം വിറച്ചുകൊണ്ട് വന്നു...
'പ്രിയ....പ്പെട്ട..... സദസ്യരേ....!'
എനിക്കപ്പോഴും ചിരി വന്നു....!
ഞാനൊരു സമ്മാനമൊക്കൊ സ്വപ്‌നം കണ്ടങ്ങനെ നിന്നു..!

പക്ഷേ,
മൈക്കിലൂടെ പിന്നെ കേട്ടതെല്ലാം എന്റെ സകല പ്രതീക്ഷകളെയും തെറ്റിക്കുന്നതായിരുന്നു. എന്റെയെന്നല്ല, എല്ലാ കാണികളുടെയും ശ്രോതാക്കളുടെയും പ്രതീക്ഷ അപ്പാടെ തെറ്റി..!
അവളൊരു പുലിയായി..! പുലിയല്ല ചീറ്റപ്പുലി...!
'പ്രിയപ്പെട്ട സദസ്യരേ.... നിങ്ങളിപ്പോള്‍ കണ്ടത് ആദ്യമായി സ്‌റ്റേജില്‍ കയറിയ,
സഭാകമ്പമുള്ള ഒരു മത്സരാര്‍ത്ഥിയുടെ അവസ്ഥയാണ്.......'
സദസ്സിലാകെ കരഘോഷം! പിന്നെ അവളവിടെ അവതരിപ്പിച്ച ഐറ്റംസ് എങ്ങനെ വര്‍ണിക്കണമെന്നറിയില്ല. അത്രക്കും മനോഹരമായ പെര്‍ഫോമന്‍സ്. അവതരിപ്പിച്ചു തീര്‍ന്നപ്പോള്‍ ഒരു മഴപെയ്‌തൊഴിഞ്ഞ പ്രതീതി..! അപ്പോഴും കരഘോഷം
മുഴങ്ങിക്കൊണ്ടിരുന്നു.... പിന്നെ ഞാനും എന്തൊക്കെയോ അവതരിപ്പിച്ചു. പലരും പലതും അവതരിപ്പിച്ചു. അതൊക്കെ ഫസ്റ്റ് ഇംപ്രഷനെന്ന ബെസ്റ്റ് ഇംപ്രഷനിടയില്‍ മുങ്ങിപ്പോയെന്ന് ചുരുക്കം. ഒടുവില്‍ ഫസ്റ്റ് പ്രൈസുമായി അവള്‍, ഗീത വേദി കൈയടക്കി. ഞാനടക്കമുള്ള
മോണോ ആക്ടന്മാരൊക്കെ അങ്ങനെ നോക്കിനിന്നു. പിന്നെ കൂട്ടത്തില്‍ ചേര്‍ന്ന് കൈയടിച്ചു.

4.4.13

ഇ - ലോകം Epi: 23 (04.04.2013)

                                 ബ്ലോഗര്‍: സാബു കൊട്ടോട്ടി,